Bu Müqavilə huququmvar.az veb-saytı və «Hüququm Var» mobil tətbiqi (bundan sonra birlikdə — «Platforma») vasitəsilə göstərilən xidmətlərdən istifadənin şərtlərini, habelə Platformanın sahibi ilə İstifadəçi arasında yaranan hüquq və vəzifələri müəyyən edir. Müqavilə Azərbaycan Respublikası Mülki Məcəlləsinin ictimai ofertaya dair müddəalarına uyğun olaraq ictimai oferta hesab olunur. Qeydiyyatdan keçmək, ödəniş etmək və ya xidmətlərdən faktiki istifadə etmək ofertanın tam və qeyd-şərtsiz qəbulu (aksept) deməkdir.
1. Əsas anlayışlar
1.1. Bu Müqavilədə istifadə olunan anlayışlar aşağıdakı mənaları ifadə edir:
- Platforma — huququmvar.az veb-saytı, onun alt bölmələri, iOS və Android əməliyyat sistemləri üçün «Hüququm Var» mobil tətbiqi və onlar vasitəsilə təqdim olunan rəqəmsal xidmətlər.
- Sahib — Platformanı idarə edən və xidmətləri göstərən «RAHA» MMC.
- İstifadəçi — Platformaya daxil olan, qeydiyyatdan keçən və ya xidmətlərdən istifadə edən fiziki və ya hüquqi şəxs.
- Vəkil-istifadəçi — Platformada vəkil və ya hüquqşünas kimi qeydiyyatdan keçmiş, müraciəti Sahib tərəfindən təsdiqlənmiş və peşəkar paneldən («Vəkil köməkçisi») istifadə edən şəxs.
- Virtual köməkçi (Ulpian) — süni intellekt texnologiyası əsasında Azərbaycan Respublikasının qanunvericiliyi üzrə məlumat xarakterli cavablar, sənəd layihələri və təhlillər hazırlayan avtomatlaşdırılmış xidmət.
- Abunəlik — müəyyən müddət (həftə, ay, il) üçün ödənişli xidmət paketinə çıxış hüququ.
- Tətbiqdaxili alış — mobil tətbiqdə App Store (Apple) və ya Google Play (Google) ödəniş sistemi vasitəsilə həyata keçirilən ödəniş.
- Hesab — İstifadəçinin Platformadakı şəxsi profili və ona bağlı məlumatlar.
2. Müqavilənin predmeti
2.1. Sahib İstifadəçiyə Platformanın funksiyalarına çıxış imkanı verir, İstifadəçi isə bu Müqavilənin və seçdiyi paketin şərtlərinə əməl etməyi, ödənişli xidmətlərin haqqını ödəməyi öhdəsinə götürür.
2.2. Platforma vasitəsilə aşağıdakı xidmətlər göstərilir:
- virtual köməkçi vasitəsilə hüquqi sualların cavablandırılması, o cümlədən səsli sual imkanı;
- ərizə, şikayət, müqavilə və digər sənəd layihələrinin hazırlanması, yüklənmiş sənədlərin təhlili;
- hüquqi kalkulyatorlar, testlər, tədris materialları, bloq və sənəd nümunələri;
- fərdi və korporativ hüquqi xidmətlər üzrə müraciət, məsləhət və görüş sifarişi;
- vəkillər üçün iş idarəetmə alətləri: işlər, müştərilər, müraciətlər, randevular, prosessual müddətlər, sənəd hazırlığı və müştəri ilə fayl mübadiləsi.
2.3. Pulsuz və ödənişli xidmətlərin tərkibi, limitləri və müddəti Platformanın «Paketlər» bölməsində göstərilir.
3. Qeydiyyat və hesabın təhlükəsizliyi
3.1. İstifadəçi qeydiyyat zamanı düzgün, tam və aktual məlumat təqdim etməlidir. Yanlış məlumatın verilməsindən irəli gələn nəticələrə görə İstifadəçi məsuliyyət daşıyır.
3.2. Platformadan müstəqil istifadə üçün İstifadəçi 18 yaşına çatmış olmalıdır. Azyaşlılar xidmətlərdən yalnız qanuni nümayəndəsinin razılığı və nəzarəti ilə istifadə edə bilər.
3.3. Giriş məlumatlarının (şifrə, e-poçt, Google hesabı) məxfiliyinin qorunmasına İstifadəçi özü cavabdehdir. Hesabdan icazəsiz istifadə şübhəsi yarandıqda İstifadəçi bu barədə dərhal Sahibə məlumat verməlidir.
3.4. Hesabın üçüncü şəxsə ötürülməsi və bir hesabdan bir neçə şəxsin birgə istifadəsi qadağandır (korporativ paketlərdə nəzərdə tutulmuş hallar istisna olmaqla).
3.5. İstifadəçi hesabını istənilən vaxt Profil bölməsindəki «Hesabı sil» funksiyası ilə və ya Sahibə yazılı müraciət etməklə silə bilər.
4. Virtual köməkçi və süni intellekt xidmətləri
4.1. Cavablar Azərbaycan Respublikasının qüvvədə olan normativ hüquqi aktlarının rəsmi mətnləri və məhkəmə təcrübəsi əsasında avtomatik hazırlanır. Bununla belə, cavablarda natamamlıq, köhnəlmiş məlumat və ya xəta ola bilər.
4.2. Prosessual müddətlərin itirilməsinə, əmlak itkisinə və ya digər ciddi nəticələrə səbəb ola biləcək qərarlar qəbul etməzdən əvvəl İstifadəçi vəkilə və ya hüquqşünasa müraciət etməlidir.
4.3. İstifadəçi virtual köməkçiyə üçüncü şəxslərin həssas şəxsi məlumatlarını (FİN, şəxsiyyət vəsiqəsinin nömrəsi, bank kartı və sağlamlıq məlumatları və s.) daxil etməməlidir.
4.4. Paketdə nəzərdə tutulmuş limit bitdikdə xidmət növbəti ödənişədək və ya limitin bərpasınadək məhdudlaşdırılır.
4.5. Virtual köməkçidən sistemin işini pozmaq, avtomatlaşdırılmış kütləvi sorğular göndərmək, cavabları toplu şəkildə kopyalayaraq kommersiya məqsədilə yaymaq qadağandır.
5. Tərəflərin hüquq və vəzifələri
Sahib
5.1. Sahib xidmətlərin fasiləsiz və keyfiyyətli işləməsi üçün ağlabatan tədbirlər görür və İstifadəçinin şəxsi məlumatlarını Məxfilik siyasətinə uyğun qoruyur.
5.2. Sahib texniki xidmət, yenilənmə və ya təhlükəsizlik səbəbindən xidmətləri müvəqqəti dayandıra bilər. Planlı fasilələr barədə imkan daxilində əvvəlcədən məlumat verilir.
5.3. Sahib bu Müqaviləni pozan İstifadəçinin hesabını xəbərdarlıq etməklə, kobud pozuntu hallarında isə dərhal məhdudlaşdıra və ya bağlaya bilər.
İstifadəçi
5.4. İstifadəçi Platformadan qanunvericiliyə, ictimai qaydaya və üçüncü şəxslərin hüquqlarına uyğun istifadə edir.
5.5. İstifadəçi yalan, təhqiramiz, böhtan xarakterli, başqasının şəxsi həyatına müdaxilə edən və ya qanunla qadağan olunmuş məzmun yerləşdirmir.
5.6. İstifadəçi Platformanın proqram təminatına, serverlərinə və digər istifadəçilərin hesablarına icazəsiz müdaxilə etmir, tətbiqin kodunu dekompilyasiya etmir.
5.7. İstifadəçi ödənişli xidmətlərin haqqını vaxtında və tam ödəyir.
6. Vəkil-istifadəçilər üçün xüsusi şərtlər
6.1. Peşəkar panelə çıxış vəkil müraciətinin Sahib tərəfindən təsdiqlənməsindən və aktiv abunəlik olduqdan sonra açılır.
6.2. Vəkil-istifadəçi Platformaya daxil etdiyi müştəri məlumatlarına və sənədlərinə görə məlumatların sahibi kimi məsuliyyət daşıyır, onların daxil edilməsi üçün lazımi hüquqi əsasa malik olmalı və peşə sirrinə riayət etməlidir.
6.3. Vəkil-istifadəçilərə münasibətdə əlavə olaraq Vəkillər üçün xidmət şərtləri tətbiq edilir.
7. Ödəniş və abunəlik
7.1. Paketlərin qiyməti, müddəti və tərkibi «Paketlər» bölməsində göstərilir.
7.2. Veb-saytda ödəniş bank kartı ilə, mobil tətbiqdə isə tətbiqdaxili alış qaydasında App Store və ya Google Play vasitəsilə aparılır.
7.3. Ödəniş, avtomatik yenilənmə, ləğvetmə və geri qaytarma qaydaları Ödəniş, abunəlik və geri qaytarma şərtləri ilə tənzimlənir. Həmin şərtlər bu Müqavilənin ayrılmaz hissəsidir.
8. Mobil tətbiq
8.1. Mobil tətbiq App Store və Google Play mağazaları vasitəsilə yayılır. Tətbiqin yüklənməsinə və mağazadan istifadəyə həmin mağazaların öz şərtləri də tətbiq edilir.
8.2. Bu Müqavilə Sahib ilə İstifadəçi arasında bağlanır. Apple Inc. və Google LLC bu Müqavilənin tərəfi deyil və tətbiqin məzmununa, xidmət keyfiyyətinə və ya texniki dəstəyinə görə məsuliyyət daşımır. Tətbiqlə bağlı bütün müraciətlər Sahibə ünvanlanır.
8.3. Apple cihazlarında tətbiqdən istifadəyə Apple-ın standart son istifadəçi lisenziya müqaviləsinin (Standard EULA) şərtləri də tətbiq edilir; bu Müqavilə ilə ziddiyyət olduqda bu Müqavilənin şərtləri üstün tutulur, bu şərtlə ki, Apple qaydalarına zidd olmasın.
8.4. Tətbiq İstifadəçinin razılığı ilə bildirişlər (push) göndərə, mikrofona (səsli sual üçün) və fayllara (sənəd yükləmək üçün) müraciət edə bilər. Bu icazələri İstifadəçi cihazın ayarlarından istənilən vaxt ləğv edə bilər.
9. Əqli mülkiyyət
9.1. Platformanın dizaynı, loqosu, proqram kodu, test sualları, tədris materialları, bloq məqalələri və sənəd şablonları Sahibə məxsusdur və müəllif hüququ ilə qorunur.
9.2. İstifadəçi materiallardan yalnız şəxsi məqsədlə və ya öz peşə fəaliyyəti çərçivəsində istifadə edə bilər. Onların Sahibin yazılı razılığı olmadan çoxaldılması, satılması və ya başqa resurslarda yerləşdirilməsi qadağandır.
9.3. Normativ hüquqi aktların və məhkəmə qərarlarının rəsmi mətnləri müəllif hüququnun obyekti deyil. Onların Platformadakı işlənmiş forması (strukturlaşdırma, axtarış, izahlar) Sahibə məxsusdur.
9.4. İstifadəçinin yüklədiyi sənədlər və virtual köməkçinin İstifadəçi üçün hazırladığı sənəd layihələri İstifadəçinin istifadəsində qalır.
10. Məsuliyyətin məhdudlaşdırılması
10.1. Virtual köməkçinin, kalkulyatorların, testlərin və materialların məlumat xarakterli olduğunu nəzərə alaraq, Sahib İstifadəçinin yalnız onlara əsaslanaraq qəbul etdiyi qərarların nəticələrinə görə məsuliyyət daşımır.
10.2. Sahib internet provayderlərinin, ödəniş sistemlərinin, tətbiq mağazalarının, hostinq xidmətlərinin və digər üçüncü şəxslərin fəaliyyətindən asılı olan fasilələrə görə məsuliyyət daşımır.
10.3. Fors-major hallarında (təbii fəlakət, hərbi əməliyyatlar, dövlət orqanlarının qərarları, geniş miqyaslı kiberhücum və s.) tərəflər öhdəliklərin icra edilməməsinə görə məsuliyyətdən azad olunur.
10.4. Bu bölmə istehlakçının qanunla təmin edilmiş və müqavilə ilə məhdudlaşdırıla bilməyən hüquqlarını məhdudlaşdırmır.
11. Müqavilənin müddəti, dəyişdirilməsi və xitamı
11.1. Müqavilə İstifadəçinin şərtləri qəbul etdiyi andan qüvvəyə minir və hesab silinənədək qüvvədə qalır.
11.2. Hesab silindikdə Müqavilə xitam olunur. Ödənilmiş abunəlik haqqının taleyi geri qaytarma şərtləri ilə müəyyən edilir. Tətbiqdaxili alışla rəsmiləşdirilmiş abunəlik hesab silinərkən avtomatik ləğv olunmur və onu İstifadəçi App Store və ya Google Play ayarlarından ayrıca ləğv etməlidir.
11.3. Sahib bu Müqavilənin mətnini dəyişə bilər. Dəyişikliklər Platformada dərc edildiyi tarixdən, İstifadəçinin hüquqlarını məhdudlaşdıran dəyişikliklər isə dərc edildikdən ən azı 10 gün sonra qüvvəyə minir. Dəyişiklikdən sonra xidmətdən istifadənin davam etdirilməsi yeni redaksiyanın qəbulu deməkdir.
12. Mübahisələrin həlli və tətbiq olunan hüquq
12.1. Bu Müqavilə Azərbaycan Respublikasının qanunvericiliyi, o cümlədən Mülki Məcəllə, «Elektron ticarət haqqında» və «İstehlakçıların hüquqlarının müdafiəsi haqqında» qanunlar ilə tənzimlənir.
12.2. Mübahisələr ilk növbədə danışıqlar yolu ilə həll edilir. İstifadəçi yazılı müraciətini huququmvar@gmail.com ünvanına göndərir. Müraciətə 15 iş günü ərzində cavab verilir.
12.3. Tərəflər mübahisəni «Mediasiya haqqında» Azərbaycan Respublikasının Qanununa uyğun olaraq mediasiya yolu ilə həll edə bilərlər.
12.4. Razılıq əldə edilmədikdə mübahisə Azərbaycan Respublikasının məhkəmələrində həll edilir.